Uit Pas Uit

Hier is als nie pluis nie. Die ekonomie laat my dink aan 'n boer wat 'n pragtige trop beeste het maar nie 'n sprietjie gras nie. Die indekse styg, maar grondstowwe wat die stof is waarmee goedere gemaak word, styg nie saam nie.

Die DOW (+11.1%) en die FTSE (+5.97%) het hierdie jaar gaaf weggespring. Die JSE hou egter nie meer by nie en het tot dusver -1.91% afgestaan. Waar die DOW en FTSE nou besig is om by hul hoogtepunte van 2007 verby te steek, het die JSE al in Maart 2012 by sy voorkrises hoogtepunt van 33,401 verbygegaan. Hier is my lyngrafiek van die DOW se daaglikse sluitingspryse.

En die JSE Alsi oor dieselfde tydperk:

Grondstofpryse styg nie saam nie

Grondstof prysveranderinge sedert Januarie 2013:

     Aluminium :     -9.29%
     Koper          :    - 6.60%
     Lood            :   -11.41%
     Niekel         :   - 7.19 %
     Sink             :   - 9.46%
     Staal            :   -37.50%
     Steenkool     :     -8.41%
     Ystererts       :     -2.51%
      Brent Olie    :    -5.36%

En sedert die begin van 2012 is die pryse óf dieselfde, óf laer.

My Maandelikse grafiek vir koper wys dat daar kans vir verdere dalings is:

Koper daal 25% sedert 1 Augustus 2011.

Grondstofaandele styg nie saam met die JSE Indeks nie

Die JSE se grondstofaandele indeks lyk ook gereed vir verdere dalings.

 Die hulpbronindeks daal 11% sedert 1 Augustus 2011.

Finansiële aandele styg saam met die JSE Indeks

Hier is die indeks vir 15 van die JSE se finansiële aandele.

Hierdie indeks het al 24% hoër gestyg as die hoogtepunt van 2008.

Finansiële dienste is die dryfkrag agter die JSE stygings.

Die Dollar

Die dollar en al die kwantitatiewe verslappingsprogramme is van belang omdat 'n sterk dollar negatief kan wees vir grondstofpryse. Hierdie grafiek wys die dollar sedert Augustus 2011 in 'n stygende kanaal beweeg.

Die koper en hulpbronindeks toon in dieselfde tyd 'n dalende en sywaartse beweging. Dis makliker om die verband tussen die dollar en grondstowwe op die maandelikse grafieke te sien. Die dollar styg 11% sedert 1 Augustus 2011.

Toekoms

Die ekonomie is uit pas uit want die finansiële deel dryf alleen die stygings. Nou gaan die Japanese Sentrale Bank ook inklim met kwantitatiewe verslapping wat Japan se monetêre basis met tot 10% van hul BBP kan vergroot. Amerika kom net by 6.8% van hul BBP. (Dis volgens John Dobosz op forbes.com.)

Hoe lank kan dit in 'n  ekonomie wat nie op kos en goedere produksie gebou is nie goed gaan?

 17 Maart 2013

'n Stilswyende of Ooglopende Heffing

Saterdag se ooreenkoms tussen Cyprus se regering en die Troika (die driemanskap wat bestaan uit die Europese Kommissie, die Internasionale Monetêre Fonds en die Europese Sentrale Bank) kom daarop neer dat 'n hulppakket van €10 biljoen aan Cyprus toegestaan sal word indien 10% van die deposito's in Cyprus se banke begedra word vir skuldverligting. En so sal die ineenstorting van Cyprus se banke voorkom word.

Ek dink dit gee 'n splinternuwe betekenis aan bankdienste en die Europese Sentrale Bank se onderneming om die euro te red teen elke prys. Die versekering wat aangebied word dat dieselfde nie ook in ander Europese lande (Spanje, Italië, Portugal, ens.) sal gebeur nie, is 'n 'belofte' van die Europese Unie se amptenary.

Instruksies wat gevolg kan word om die waarde van sommige beloftes te bepaal:

• Tel 'n klip op en hou dit styf in jou een hand.
•  Luister na 'n blofte en hou dit styf in jou ander hand vas.
• Draai 'n paar keer in die rondte, of verwyl 'n bietjie tyd.
• Maak jou hande oop en kyk wat het jy.

Geld word slegs deur 'vertroue' in die uitreiker daarvan ondersteun sedert van die goudstandaard afgestap is. Dus is ons almal wat rande, ponde, dollar, ens gebruik uitgelewer aan die integriteit van die regerings wat die geld uitreik.

Goud verskil van geld in die opsig dat dit nie deur 'n regering uitgereik word nie en dat dit nie gebruik kan word om brood en melk te koop sonder om dit te om te ruil vir geld nie. Vergelyking van die prys van goud in dollar, yen, rand, ens is insiggewend.

Sedert 2008 is Amerika, Britanje, Japan, die EU en ander lande met oorgawe besig om hul hoeveelheid geld te vermeerder deur bateaankope te doen wat die noemnaam kwantitatiewe verslapping dra. In Augustus 2008 was die prys van goud $825 en Vrydag, $1592, 'n styging van 92% in dollar terme. Die hoeveelheid beskikbare goud het nie dramaties verminder nie, maar die hoeveelheid beskikbare dollars is 'n ander saak.

Hier's 'n grafiek waarin ek die persentasie verandering in die randprys van goud, die dollarprys van goud en die prys van dollars in rand saamgesit het. Die begin datum is 1 Agustus 2011 omdat dit die tyd is toe Amerika se kredietwaardigheid afgegradeer is en omdat die dollarprys van goud in September 2011 'n hoogtepunt bereik het. Sedert het die randprys van goud met 34% vermeerder en die dollarprys van goud met 3% verminder. Die groen lyn is die randprys vir die dollar en hoe hoër die lyn styg hoe minder dollar kry mens vir 'n rand.

Hier is 'n grafiek van die rand in dollar(sente). Op 1 Augustus 2011 kon mens $0.1502 kry vir 'n rand en op 15 Maart 2013 slegs $0.1089, 38% minder.

 

Cyprus is 'n klein eilandjie, en tog, as die direkte deposito vermindering deurgevoer word, gaan nie net die Cypriote bedreig voel nie. Kwantitatiewe verslapping wat onopsigtelik is vir die meerderheid laat individue nie so direk bedreigd voel nie.

 Sedert Die Groot Sametrekking

 

 Hier is die JSE se styging sedert November 2012 in daaglikse kerse.

Eintlik styg die JSE al sedert November 2008 en het in Julie 2012 die hoogtepunt van 2008 verbygegaan. Bygesê, met tye het die indeks teruggesak met meegaaande oomblikke van twyfel of die groot sametrekking agter die rug is, soos aan die begin van Augustus 2011 toe die Amerikaners hul skuldplafon moes verhoog. Amerika het hul AAA gradering verloor, en die Rand het binne 8 weke met 20% verswak teenoor die dollar. Aan die begin van Maart 2013 gaan die Amerikaners weer voor hul skuldplafon te staan kom. Tog het die ekonomiese omgewing wêreldwyd reeds verbeter, dink maar aan die Europese Sentrale Bank se LTRO lenings aan banke (in Desember 2011 en Februarie 2012) wat nou al terug betaal word.
Op hierdie maandelikse kersgrafiek van die JSE Alsi kan die pad van die indeks die afgelope vier jaar gesien word, en die nuwe hoogtes wat nou bereik word. Die besigheidssiklus is by die herstelfase verby en besig om uit te brei. Vooruitsigte vir 'n resessie word nie meer bespreek nie.

Ek kyk na die grafieke van Sasol en Grindrod omdat olie en vervoer belangrik is vir ekonomiese groei.
Die prys van brentolie het nou bo $112 beweeg, oppad na $126 waar brentolie al twee keer, in April 2011 en Maart 2012, gedraai het sedert die groot sametrekking van 2008.

Sasol se prys hou rigting saam met die van brentolie.

Op hierdie daaglikse kersgrafiek het Sasol se prys oortuigend by die keerlyn verby 37000  beweeg oppad na 41150.

En die maandelikse kersgrafiek wys die kanaal waarin Sasol beweeg sedert 2008 en dat hy reeds in Januarie 2012 by 41150 was. Sasol se prys is nog steeds laer as die hoogtepunt van 2008.

Daar is hoë verwagtings vir Grindrod wat sy 2012 jaarverslag aan die einde van Februarie bekend gaan maak. Die grafiek het in November en Desember 'n plat driehoek gevorm en die toepaslike hoeveelheid gestyg. Nou het 'n 'vlag' gevorm met die vooruitsig van 'n styging tot 1950.

Grindrod se prys is nog 30% laer as die hoogtepunt van Julie 2008 en die grafiek met maadelikse kerse wys die pad tot hierdie week.

Met al die goeie vooruitsigte is dit nodig om in gedagte te hou dat aandele se pryspad uit stygings  en dalings bestaan. Die Amerikaners en hul skuldplafonworstelinge moet in die oog gehou word vir moontlike teleurstelling.

16 Desember 2012

Die Aankope Gaan Voort

Die Amerikaanse Federale Reserwe het Woensdag aangekondig dat 'Operation Twist' vervang gaan word met aankope van $45 biljoen se langertermyn staatseffekte per maand. Terselfdertyd gaan hulle voort met die aankoop van $40 biljoen se verband gesteunde sekuriteite soos in September aangekondig.  Die doel is om rentekoerse laag te hou, ekonomiese groei aan te moedig en so Amerikaanse werkloosheid te verminder.

Teen Vrydag was die volgende dollar en wisselkoers vooruitsigte opvallend:

Die EUR/USD styg by 1.3120 verby en verdere verswakking van die dollar, tot 1.3800, is nou in die vooruitsig.

Die Rand wat sedert Oktober aansienlik teenoor die dollar verswak het, het gedraai en lyk sterker, oppad na R8.50 vir 'n dollar.

Die Yen wat die afgelope jare voortdurend teenoor die dollar versterk het ten spyte van die Bank van Japan se pogings om 'n swakker Yen te bewerkstellig, het verder verswak en verhandel Vrydag teen Y83.52 vir 'n dollar, 8% bo September 2012 se laagtepunt soos in die maandelikse kersgrafiek gesien kan word.

Die Dollar Indeks wat die dollar teen ‘n mandjie geldeenhede (Euro, Pond Sterling, Yen, Kanadese Dollar, Sweedse Krona en Switserse Frank) meet, is by ‘n keerpunt. ‘n Beweging hoër as 79.56 het ‘n goeie kans vir verdere styging en ‘n beweging laer een vir verdere daling. 

 

Met 'n swakker dollar kan hoër kommoditeits pryse en aandeelpryse verwag word. En 'n hoër goudprys. Hierdie is prysstygings as gevolg van dollar swakte en nie as gevolg van 'n verandering in vraag en aanbod nie.

Met Die Einde Van Die Dans

 Dinsdag, 11 Desember 2012

Die Amerikaanse FOMC (Federal Open Market Committee) het verledejaar, na hul tweede kwantitatiewe verslappingsprogram voltooi is, aangekondig dat die Amerikaanse ekonomie verder ondersteun gaan word deur die verkoop van korttermyn effekte en die aankoop van langtermyn effekte. Na hierdie program, wat sedert Oktober 2011 geimplimenteer word, word verwys as 'Operation Twist' omdat die program ten doel gehad het om leenkoste te verlaag deur die lang- en korttermyn opbrengskoerse te 'draai', oftewel, te 'twist'. Amptelik is die program die 'Maturity Extension Program' genoem. Aanvanklik sou die program teen Junie 2012 ten einde loop, maar is verleng tot Desember 2012.

 Nou's ons amper daar.

'n Grafiek van die DOW en die opbrengskoers van Amerikaanse 10jaar effekte (bonds) dui die effek van die program duidelik.

Die Dow en 10jaar opbrengskoers hou gewoonlik in dieselfde rigting, maar hul paaie skei met die aanvang van 'Operation Twist'. Terwyl die DOW styg, beweeg die opbrengskoers sywaarts, of daal. Met voltooing van die program sal die opbrengskoers vinnig styg en die prys van effekte (bonds) daal om weer die vorige balans met die DOW te herstel.

 'Operation Twist' het ook die beweging van die dollar, goud en alles wat daarmee saam beweeg beinvloed.

Op hierdie grafiek het ek die DOW en die dollar saamgesit om die verskil in die beweging van die dollar teenoor die DOW tydens die kwantitatiewe verslappingsprogramme, of, QE, en 'Operation Twist' aan te dui. Tydens die QE programme het die dollar en die DOW in teenoorstaande rigtings beweeg, dws, die dollar het verswak terwyl die DOW gestyg het, en tydens 'Operation Twist' beweeg hulle in dieselfde rigting; stimulering vind plaas sonder dollar verswakking.

Wanneer die dollar in 'n grafiek saam met goud gesit word, daal die dollar terwyl goud styg tydens die QE programme. Die posisies is omgekeerd tydens 'Operation Twist' en goud kry 'n dalende tendens terwyl die dollar styg.

Uit hierdie grafieke lei ek af dat die voltooing van 'Operation Twist' opbrengskoerse aansielik sal laat styg (met gepaardgaande dalende effektepryse) en verhoogde leenkostes (rentekoerse op verbande, lenings, ens). Juis dit wat deur die program 'laag' gehou is om die Amerikaanse ekonomie te stimuleer.

Môre, die 12de Desember gaan Ben Bernanke, die voorsitter van die FOMC, 'n verklarinig maak. Daar word verwag dat voortgegaan sal word met die aankoop van langertermyn effekte maar die verkoop van korttermyn effekte, wat die langertermynaankope befonds het, gestaak sal word. Dit kan tot stygings van die goudprys (en metaalprys, ens) lei en 'n gepaardgaande daling van die dollar.

Al sou die dans verby wees, die musiek duur voort.

Die Verhouding tussen Prys en Verdienste

Die prys van 'n aandeel in 'n maatskappy, gedeel deur die verdienste per aandeel gee die verhouding tussen prys en verdienste, die P/V (prys-verdienste). Hierdie syfer stel die belegger in staat om verskillende beleggings te vergelyk en die mark se oor- of onderwaardering van die belegging te sien.

As voorbeeld:
BHP Billiton se sluitingsprys op 15 November 2012 was 26957c en die verdienste per aandeel (soos in hul finansiële staat van Junie 2012) was 2628.59c. Dit gee 'n P/V van 10.25.

      26957 ÷ 2628.59 = 10.25

'n Verdienste van 2628.59c vir tien en 'n kwart jaar is ekwivalent aan die huidige prys van BHP Billiton.

Om te sien hoe prys en verdienste rigting hou, het ek BHP Billiton se verdienste (op die regterkant se as) en prys aan die einde van die frinansiële periode (op die linkerkant se as) op een grafiek saam gesit.

Naspers se sluitingsprys op 16 November 2012 was 54400c en die verdienste per aandeel (Maart 2012 finansiële verslag) was 1297c. Dit gee 'n P/V van 41.94.

Saamgesit in 'n grafiek loop Naspers se verdienste (op die regterkant se as) en prys aan die einde van die periode (op die linkerkant se as) as volg:

BHP Billiton, 'n gediversifiseerde grondstof produsent, met 'n P/V van 10.25 kan met Naspers, wat, onder andere, betaaltelevisie bedryf en 'n P/V van 41.94 het, vergelyk word. Naspers se P/V is aansienlik hoër as die van BHP Billiton. Hiervolgens het beleggers hoër verwagtings van Naspers se toekomstige verdienste as van Billiton s'n. Vanuit die oogpunt van 'n voornemende belegger kan Naspers as 'duur' beskou word en Billiton as 'n 'waarde' aandeel - een met 'n laer prys.

Wanneer 'n maatskappy se aandele 'n besonders lae P/V het, dui dit daarop dat beleggers min groei verwag en nie optimisties is dat die prys aansienlik sal styg nie.

Vegelyk Reinet wat op 16 November op 1588c gesluit het, 'n verdienste (Maart 2012 finansiële verslag) van 451c per aandeel het en dus 'n P/V van 3.51.

Met die formule wat die P/V bepaal kan ander beleggings ook vergelyk word, bv: Kontant wat teen 'n opbrengs van 9.5% belê word, gee 'n P/V van 10.52, wanneer 100 deur 9.5 gedeel word.

Die prys-verdienste verhouding is van hulp wanneer verskillende beleggings vergelyk word en een apek waarna gekyk kan word wanneer 'n belegging oorweeg word. 'n Suksesvolle beleggings keuse word gemaak wanneer in 'n maatskappy belê word wat, na deeglike ondersoek, blyk groei potensiaal te hê, maar nog nie deur die mark na waarde geskat word nie. Anders gestel: 'n belegging in 'n maatskappy met goeie waarde teen 'n lae prys.   

Week van 16 November 2012

Vooruitskouend en Terugskouend

Agter die rug: Amerikaanse presidensiële verkiesing en Sjienese aanstelling van nuwe leiers.
Voor in die pad: Amerikaners wat 'n plan moet maak vir regeringsbesparings en belasting verhogings voor die einde van hierdie jaar. Europa se voortslepende worsteling met hul skuld. Sjiena wat staal oorproduksie, nie betalende banklenings, geboue sonder huurders en nou ook verswakkende klerebedryf uitvoere sal moet aanspreek saam met ekonomiese herbalansering.

Ekonomiese bedrywighede wêreldwyd is besig om voort te beur en is 'n voortdurende proses van probleem hantering. Daar is nie 'n uiteindelike oplossing wat alles seepglad sal laat verloop en 'n utopia tot stand sal bring nie. Elke dag dra by: vooruitskouing skep verwagtings en terugskouing bring hopelik groter insig.

Op die 2de November het die JSE Alsi op 'n hoogtepunt van 37,664 gesluit, op die 6de November 'n vinnige draai by 37,749 gemaak en nou weer gedaal om vrydag die 16de op 36,818 te sluit.

Daar is ondersteuning by 36,620 en die 50 dae bewegende gemiddeld.

Hou die Amerikaners ingedagte. Die eerste aankope van die $40 biljoen per maand se verband gesteunde sekuriteite wat in September deur Ben Bernanke aangekondig is, se effek kan dalk binnekort gesien word.

Die toekoms is nie uitsigloos nie, ten spyte van die nuusopskrifte, en wanneer die markte daal, kyk gerus fyn of die aandele waarin jy belangstel nie dalk nou 'n moontlike winskoop is nie.