Week van 21 September 2012

Die Rede vir Ekonomiese Stimulering

Om die rede vir ekonomiese stimulering uit die oog te verloor is om toe te gee aan selfmisleiding. Vele stimulerings programme is al sedert die finansiële inkrimping in 2008 in werking gestel; tot nog toe, nie genoeg nie. Die Bank van Japan het hierdie week aangekondig dat hul bateaankope program met nog ¥10 triljoen verhoog gaan word tot ¥80 trijloen. Amerika, Europa, Britanje, Switserland, Japan en Sjiena se pogings om wêreldwye resessie af te weer moet vroeër of later 'n resultaat lewer. Almal woeker om 'n ekonomiese droogte te verhoed deur bietjie nat te lei.

Die Reaksie van Grondstowwe

Na die Amerikaners se stimilusprogram aankondiging het die JSE finansiële en industriële indekse teruggesak en die hulpbronindeks het uitbundig gestyg. Hierdie week was daar 'n ommekeer; die hulpbronindeks het teruggesak (-3.66%) en die finansiële indeks het sy vroeëre stygende tendens voortgesit (+1.47%). Daar's nog net beloftes van beter vooruitsigte vir grondstowwe en verdere dalings moet verwag word.

Omdat Sjienese verbruik van grondstowwe as die stimilus vir stygende grondstofpryse gesien word, is dit nodig om na die Shangaise Saamgestelde Indeks te bekyk. Die indeks styg uit die dalende kanaal (op my grafiek met 'n stippellyn aangedui), na die aankondiging van infrastruktuurprojekte in Sjiena, maar draai terug en daal Donderdag om 'n nuwe laagtepunt, 2024, te maak. Sedert die hoogtepunt van die indeks in Maart hierdie jaar, 'n daling van -17.72%. Die jaar tot dusver, sedert die opening, 2119, in Januarie, tot 21 September 2012 se sluiting, 2026, het die indeks gedaal met -4.38%. Gemeet teen die S&P, FTSE 100, CAC 40, Hang Seng, Nikkei 225, BSE Sensex,  en  JSE Alsi, toon slegs die Shangaise indeks 'n daling vir 2012 tot dusver.

Aluminium het hierdie week met -3.84% gedaal en koper tree -1.41%  terug. Opvallend was die styging van 9.09% in die prys van staal stawe op die LME.

 Van die hoogtepunt, 700, in Augustus 2011 tot die laagtepunt, 316, op 13 September 2012 was 'n daling van 54%. 'n Styging bo 370 sal aandui dat dit met staalvervaardiging beter gaan.

Die Prys van Olie

Maandag het olie met 3% gedaal en dalings is die res van die week voortgesit en Brent sluit vrydag 4.44% laer. Spekulasie oor wat die daling veroorsaak het was volop: 'n 'foutiewe' rekenaar inskrywing, die Saudies wat meer olie gaan pomp, Amerika wat reserwe olievoorrade vrygestel het (dit is ontken) ens. Dit was seker bloot net iemand wat verkoop het nadat hy die kanse vir verdere stygings in die olieprys oorweeg het. Die vraag na olie hou verband met ekonomiese groei en ontwikkeling en dit was die afgelope tyd nie so positief dat daar van vreugde rondgedans is nie, in teendeel, die voorspellings bied geen inspirasie nie. Tel hierby die sukses wat behaal is om voertuig brandstof verbruik te krimp. En die vooruitsig van elektriese voertuie. Belasting op brandstof is 'n belangrike inkomste vir regerings en verminderde brandstof verbruik verminder hierdie inkomste. Die Britse regering oorweeg 'n 'pad belasting' om hierdie inkomste op dieselfde vlak te probeer hou.
Ten spyte daarvan dat 'n swakker dollar 'n hoër olieprys impliseer, dink ek dat daar goedkoper olie in die vooruitsig is.

Verwagtings vir Goud

Goud se grafiek het nou 'n 'koppie' gevorm en lyk asof 'n 'oor' gevorm gaan word. Dit beteken 'n laer prys vir 'n wyle en wanneer die prys $1,800 verbysteek, sal die stygings weer voorgesit word.
Hier is my grafiek vanaf die hoogtepunt in September 2011 to vrydag 21 September 2012.

Mag hierdie week net positewe verassing oplewer.

Effekte en die Opbrengskoers

Week van 14 September 2012

Effekte en die Opbrengskoers

Verdere ondersteuning vir die Amerikaanse ekonomie het hierdie week gekom met die aankondiging dat die Federale Reserwe maandeliks $40bn se verband gesteunde effekte gaan koop. In afwagting van die aankondiging het die dollar reeds begin verswak en die DOW begin styg. Die afgelope jaar is Amerikaanse staatseffekte met geesdrif gekoop omdat geglo word dat die risiko daar minder is as met beleggings elders in die ekonomie. 'n Laer opbrengs gaan met 'n vermindering in risiko gepaard. Die opbrengskoers van 10 jaar effekte het in Julie 'n laagtepunt van 1.40% bereik en noudat geld uit staatseffekte beweeg, styg die koers en sluit Vrydag op 1.86%.

Van die geld wat uit staatseffekte beweeg gaan na die DOW. Op my grafiek het die DOW 'n onderstebo kop-en-skouer patroon gevorm wat op 'n styging na 14400 wys, natuurlik, indien daar nie iets onvoorsiens gebeur nie.

Inflasie, Goud en Platina

Inflasie verwagtinge het verhoog en vir beskerming daarteen beweeg geld na goud en ook platina. Ek het goud en platina se grafieke vanaf Augustus 2009 saamgesit om vergelyking makliker te maak. Goud sluit Vrydag oop 1770, 'n styging van 10% sedert die begin van Augustus en platina sluit op 1701, 'n styging van 22% oor dieselfde tyd.

Het platina sy hupstoot sedert Augustus gekry ten spyte van die stakings, of het die stakings bygedra? Om 'n antwoord te probeer kry het ek Impala Platinum se grafiek saam met die van platina gesit en die negatiewe effek van die stakings is duidelik. Die ander platinamyne se grafieke wys dieselfde patroon.

Verswakking van die dollar beteken 'n verhoging in die pryse van grondstowwe en olie. 'n Hoë olieprys is negatief vir ekonomiese groei en sou in ag geneem gewees het met die besluit van die Federale Reserwe. Amerika het groot voorrade olie en produseer self genoeg om 'n prysstyging se negatiewe effek teen te werk. Amerika lyk gereed vir ekonomiese groei en verhoogde indiensneming.

Koper, Goud en die Opbrengskoers

Koper, aluminium, lood en niekel se pryse styg terwyl die dollar verswak. Aluminium was die voorloper met 'n styging verlede week van 9.51% en koper het die agterhoede gevorm met 'n styging van 7%. Die prys van koper word gesien as aanduier van ekonomiese aktiwiteit, maar as die prysstyging beinvloed word deur dollar beweging, sou koper hier nogtans as voorspeller optree? Goud bied beskerming teen inflasie. Hier het ek goud en koper saamgesit en beide styg sedert Augustus.

Om te sien watter een vaar die beste, koper, as voorspeller van ekonomiese aktiwiteit of goud, as beskermer teen inflasie, het ek die prys van koper deur die van goud gedeel. Die verhouding tussen koper en goud lyk so:

Vanaf Januarie 2011 tot Oktober 2011 het koper in vergelyking met goud aansienlik gedaal, toe begin styg, maar daal weer sedert Maart 2012. Optimisme ten opsigte van ekonomiese aktiwiteit lyk asof dit nou weer begin toeneem. En sou bevestig word as die opbrengskoers van staatseffekte ook verder styg.
Hier het ek die koper/goud verhouding (oranje lyn) en die 10 jaar staatseffekte opbrengskoers (blou lyn) saamgesit. 'n Stygende opbrengskoers lyn dui op inflasie en 'n stygende koper/goud lyn op verhoogde ekonomiese aktiwiteit.

Grondstowwe

Die verwagting van verhoogde ekonomiese aktiwiteit en die gepaardgaande verhoogde vraag na grondstowwe kan in die beweging van die JSE indekse gesien word. Die JSE alle aandele indeks het hierdie week met 2.25% gestyg. Die JSE hulpbronaandele indeks het uitgetroon met 'n styging van 6.63%. Dit lyk soos bevestiging van die verwagtinge van verhoogde ekonomiese aktiwiteit.

Om nou in aandele belê te wees, is om aan die 'regte' kant van die beleggingsveld te staan.

Sentrale Bank Ondersteuning en Olie

7 September 2012

Sentrale Bank Ondersteuning en Olie

Sentrale Banke, Sjienese Ekonomie Beplanners en die ALSI

Die Europese Sentrale Bank se Mario Draghi het hierdie week die Regstreekse Monetêre Transaksie (Outright Monetary Transactions) program aangekondig wat saam met die Europese Finansiële Stabiliteits Fasiliteit (EFSF) en Europese Stabiliteits Meganisme (ESM) ondersteuning gee aan regerings met 'n groot skuldlas. Die markte het positief gereageer. Goud ook, en die dollar daal tot onder die 200 dae bewegende gemiddeld.

Die Amerikaners was teleurgesteld toe bekend gemaak is dat hulle die afgelope maand slegs 96,000 nuwe werksposisies (landbou uitgesluit) geskep het, terwyl 125,000 verwag is. Minder mense wat kan koop is nie 'n toestand waarna die Amerikaners streef nie en hulle oë is nou op Ben Bernanke om te ondersteun. Sy spreekbeurt is Donderdag, die 13de September.
Die DOW het hierdie jaar telkens by 13,275 gekom en teruggedraai en sluit Vrydag by 13,306, net sowat 700 punt kort van die Oktober 2007  hoogtepunt van 14,000.

Die JSE Alsi het in Januarie 2012 sy vorige hoogtepunt van 33,400 (bereik in Mei 2008) verbygegaan en maak nuwe hoogtepunte sedert Julie. Dit was die moeite werd om sedert 2009 in die JSE belê te wees. Vanaf die laagtepunt in Februarie 2009 'n styging van 97%.

Die hulpbronaandele het aanvanklik goed gevaar en styg 42% tussen Februarie 2009 en Februarie 2011; sedertdien 'n daling van 18%. In die kleiner wordende driehoek op my grafiek, is 45,000 en 53,500 van belang. 'n Daling onder 45,000 sal op verdere dalings dui en 'n styging bo 53,500 op verdere stygings.

Sjiena se verswakte vraag na grondstowwe het bygedra by tot dalings in die hulpbronaandeel pryse. Hierdie week het die ekonomie beplanners van Sjiena nuwe infrastruktuur projekte ter waarde van 1triljoen Yuan ($157bn) aangekondig. Hulle beplan onder andere 25 stedelike spoornetwerke, 13 hoofweë, hawens, lughawens, waterwerke, ens. Dit het die aandele van steenkool, ystererts en staalvervaardigers laat styg - miskien net 'n paar kortverkopers uitgeskud? Die Russiese staalvervaardiger, Evraz, wat op die Londonse Beurs genoteer is, het Vrydag met 14.87% gestyg. Al die projekte is nogal iets om oor te dink, veral as in ag geneem word dat die Britte nou al vir jare besig is om die bou van een spoorlyn en die bou van een ekstra aanloopbaan by Heathrow te debateer, soms nogal onhoflik, en 'n besluit word nie binne die volgende paar jaar verwag nie.
Die beplanners se aankondiging het die Sjanhaise Saamgestelde Indeks 'n hupstoot van 3.92% gegee en verdere stygings lyk moontlik.

Die Sjienese se behoefte aan grondstowwe is nog nie uitgeput nie. In 1990 was 26% van hul bevolking verstedelik en van die huidige 1,3 biljoen woon 51% nou in stede. Die verwagting is 'n verhoging tot 70% in 2035. Van Amerika se bevolking van 331,5 miljoen is 75% verstedelik, (volgens Wikipedia).

Kumba IO

Kumba Iron Ore (KIO) se prys het verlede week met 11.76% gedaal en hierdie week met 3.75% gestyg. Die daling het nie met 'n gelyke daling in volume gepaard gegaan nie. Ek het 'n grafiek getrek van die volume balans deur elke dag se volume by die vorige te tel, indien die prys gestyg het; af te trek, indien die prys gedaal het; en as die prys dieselfde as die vorige dag was, het ek nul by die vorige dag se volume getel. Die dalende prys en stygende volume is opvallend.

Volgens Kumba se verslag van Junie 2012 het hul produksiekoste gestyg van R150/t in 2011 tot R180/t in 2012. Die gemiddelde wisselkoers vir 1H 2012 was R7.93 - in dollars is die koste dan $22.70/t - en hulle het ystererts verkoop teen 'n gemiddelde prys van $142/t. Met 'n swakker Rand, soos die onlangse verswakking tot R8.4/$, sal KIO se dollarkoste laer wees en sy Rand inkomste hoër.  Die verslag noem dat hulle nie verwag dat die prys van ystererts veel laer as $130/t sal daal nie. Vergelyk die prys van $91.50/t waarteen Vale hierdie week 'n vrag ystererts in Sjiena verkoop het, (volgens reuters se webblad). Staan Sjiena gereed om te koop soos toe die pryse so laag was in 2009?

Olie

Met die orkaan 'Isaac' se tog deur die Meksikaanse Golf is werk op die oliebore daar gestaak en die prys van olie het min hierop gereageer. Hoekom?

Die vraag na olie in Amerika is 22% van die totale wêreldvraag. Hulle het uit eie bronne aan 83% van hul vraag hierdie jaar voldoen en het die vooruitsig om teen volgende jaar selfvoorsienend te wees. Hul olievoorrade is hoog. 'n Amerika wat selfvoorsienend is in olie en genoeg aardgas en steenkool het, kan energievoorsiening wêreldwyd beinvloed.

Hier is my maandelikse grafiek van Sasol. Solank die prys bo 33800 is, is die vooruitsig positief.

Ek hou hierdie verwikkelinge met belangstelling dop.

Wanbalans in Vraag en Aanbod

Week van 31 Augustus

Wanbalans in Vraag en aanbod

Aan die hoë verwagtings vir AngloGold (ANG) en Exxaro (EXX) is nie voldoen nie. AngloGold daal sedert 20 Augustus met 9% en Exxaro met 16%. Kumba Iron Ore (KIO) het ook die afgelope twee weke met 11% gedaal. Steenkool en ysterertspryse het nog nie 'n bodem bereik nie; hul dalings versnel (20% die afgelope 3 weke) en daarmee saam Exxaro en Kumba se pryse. Ystererts en steenkool produsente het almal ingespring om aan die 'groot' vraag na grondstowwe in Sjiena te voldoen en nou kwyn die vraag. Vele artikels verwys na Sjiena se huidige wankelende vraag na ystererts en die probleem blyk in hul staal industrie gesetel te wees. Om vir laer staalpryse te vergoed word produksie verhoog en om koste te besnoei word ystererts en steenkool voorrade by die staalwerke verlaag wat lei tot 'n verhoging van ystererts en steenkoolhope by hawens. Vroeër of later sal iets êrens meegee. Natuurlik het staalvervaardigers lenings by Sjienese banke wat terugbetaal moet word en so kom die banke ook onder druk. Hierdie toestand wys in die voorgesette daling van die Shanghaise Saamgestelde Indeks.

Die Sjienese se pogings om 'n 'sagte' landing vir hul ekonomie te bewerkstellig - 'n groeikoers van 7 - 8% in plaas van 10 - 12% - het die effek van 'n 'harde' landing vir SA grondstofaandele.

Ystererts en Steenkool

In Kumba Iron Ore se maandelikse kersgrafiek beweeg die kerse nou buite die stygende kanaal.

'n Kumba (KIO) maandelikse lyngrafiek saam met die prys van ystererts wys hoe die twee pryse van mekaar weggetrek het. Verwag maar dat hulle weer nader aan mekaar sal beweeg.

Steenkool se wankelende vooruitsig ten opsigte van kookssteenkool vir gebruik in staalvervaardiging is nie die enigste probleem vir steenkoolprodusente nie. Die verhoogde skaliegas produksie in Amerika het die gasprys daar laat daal tot waar kragstasies begin het om deels van gas gebruik te maak vir kragopwekking. Die Amerikaanse steenkoolprodusente het markte buite Amerika begin soek. Boonop staan die Brasiliaanse maatskappy, Vale, gereed met produksie by hulle steenkoolmyn in Moatze in Mosambiek en dieselfde met Riversdale Mining (waarvan Tata Staal 'n deel besit) se steenkoolmyn in Mosambiek se Tete provinsie. Die kompetiese vir Exxaro se uitvoer steenkool is fel en dit kan in die dalende prys gesien word.

 Die goudprys en goudmynaandele

Ten spyte van stygings in die goudprys het goudmynaandele in SA gedaal. Ek het na Goldcorp en Barrick Gold (Kanada se beurs) se grafieke gekyk en alhoewel hulle soos AngloGold in Mei en Julie hierdie jaar laastepunte bereik het, het hulle nie die afgelope week gedaal nie, inteendeel, hulle styg. Sou die berigte dat onrus soos die by Marikana na SA goudmyne kan versprei 'n rol speel? Hier is my grafiek met die teleurstellende daling die afgelope week.

'n Interesante Grafiek

Die grafiek van Supergroup (GB:SGP) (waaroor ek op 17 Augustus geskryf het), het wel aan die verwagte styging voldoen. Supergroup beplan om op 10 September 'n finansiële verslag bekend te maak en die aandeelhouers staan gereed by die weerstandslyn van 502p. Verdere stygings of dalings hang van die verslag af.

Die Prys van Mielies

Die mielieprys in Amerika is gereed om terug te sak. 'n Dalende mielieprys kan die druk op wêreld voedselpryse verlig. Wat sou 'n prysdaling ondersteun, ten spyte van die droogtes?

Die aanbod van mielies vir voedselverbruik kan verhoog as die Amerikaners die hoeveelheid mielies wat vir brandstof produsering opsygesit word verlaag. Dit beteken laer mieliepryse. Maar sal minder hernubare olie tot gevolg hê wat brandstofpryse kan verhoog. Die Amerikaners en Britte het onlangs by die International Energy Agency (IEA) aansoek gedoen om van hul reserwe olievoorrade vry te stel. Meer beskikbare olie; laer pryse. Siedaar, die balans is herstel. As dit tog maar net so maklik was!

Dink fyn en hou balans.